"الله أكبر" على بوليس مطيش في قلب كياس؟؟ الشمس تنڨبلو في راسو في الصيف والڨوايل؟؟؟
"الله أكبر" على بوليس مطيش في قلب الرونبوان؟؟ الريح يصرفڨ فيه مالجهات الكل والمطر ترنخ فيه كل مرة ربي يعطي خيرو؟؟ في الشتاء؟؟؟
"الله أكبر" على بوليس خرج يندب على همو مالصباح؟؟ بوليس خلى مرا وصغار ودار وساعات ام وبو ما عمرهم ما نساووا بش يدعيولو في صلاتهم الساذجة بش ربي يسترو؟؟؟؟
"الله أكبر" على شكون؟؟ على بوليس معرض لكل أنواع الخطر .. خطر الطريق؟؟ خطر الارهاب؟؟ خطر الادارة.. خطر الحوادث.. وحتى خطر القضاء والقدر؟؟؟
"الله أكبر" على شكون؟؟ على بوليس الي حتى خبر موتو .. ولا خبر انفجار لغم عليه.. ولا خبر قصان ساقو؟؟ صارت اخبار عادية وروتينية وتتعدى بعد اخبار الدربي؟؟؟؟
"الله أكبر" على شكون؟؟ على بوليس ولدو يستنى فيه بش يروحلو بالبراية والاقلام الشمعية الي طلبتهم منو انيستو البارح في المدرسة وقاللها تو بابا الليلة يشريهملي؟؟؟
"الله أكبر" على شكون؟؟؟ على بوليس مقيد معاه بوه وامو المعوزين في دفتر العلاج المجاني الي وفرتهولو الوزارة.. بش يداويلهم ركايبهم وعينيهم الي تعبوا؟؟
"الله أكبر" على شكون؟؟ على اعوان الامن.. اولاد الشعب الي جايين من كل اصقاع البلاد بعد ما تسكرت في وجوههم البيبان وما لقاوش خدمة اخرى توفرلهم عيش كريم؟؟
"الله أكبر" على شكون؟ على بوليس أداة في ايد كل نظام نحطوه احنا ببهامتنا ولامبالاتنا..؟؟
وشبيه "الله مش أكبر" على الي سرقوا البلاد وباعوها؟؟
وشبيه "الله مش أكبر" علي غسلك مخك وعملك لافاج ورماك حطب في محرقة انت بش تكون فيها رماد وهو بش يقبض كاش وبالدوفيز؟؟
وشبيه "الله مش أكبر" علي قتل شهداءنا ويتم صغارهم؟؟ وشوى الكبيدة متاع اميماتهم؟؟؟
وشبيه"الله مش أكبر" علي سمسروا بتاريخنا وارضنا و ثروتنا وحضارتنا وترابنا و دمنا ... وبمستقبل صغارنا...
شبيه"الله مش أكبر" علي بدل ألوان بلادنا؟؟ وبدل كل شئ بالأكحل.. وقتل الحمام والخطيفة... وكبر الغرابيب السود في ربوعنا؟؟
شبيه"الله مش أكبر" علي بكانا والي رخس دمنا والي حرمنا حتى مالدواء؟؟؟؟
شبيه "الله مش أكبر" علي يحب يغتصب لغتنا وموسيقتنا وفننا ودنيتنا؟
براس امك شبيه"الله أكبر" كان عالضعيف والزوالي؟ علاش مهوش اكبر عالظالم والسارق والمعتدي والمغتصب؟؟؟؟ علاش علاش؟؟؟؟؟
الله اكبر؟؟؟ فاش قام؟؟!؟
فردوس بوغطاس الشورابي...
Aucun commentaire:
Enregistrer un commentaire